Ареспубликатә партиа &quotАҧсны жәлар ракзаара Афорум&quot Аҳәамҭа

Ареспубликатә партиа "Аҧсны жәлар ракзаара Афорум" Аҳәамҭа

Аҧсуа жәлар ракзаара, рлахьынҵа, рҧеиҧш ҳхаҿы иаҳзаагом аҳәаанырцәтәи аҧсуа диаспора алахәымкәа. Абасеиҧш хдыррала азнеира ҟәыҕа аныҟамла-Аҧсны ахьыҧшымрагьы аҵакы ацәыӡуеит. Аҧсуа диаспора рҭоурыхтә ҧсадгьыл иамадоуп дацла-ҧашәла, шьала-дала. Уи аиқәырхаразы политикала, дипломатиала, бџьарла ақәҧара иалахәын 1918, 1978,1989, 1992-1993 шш. раан. Ақырҭуа агрессорцәа анҳақәла, раҧхьатәи амшқәа рзы рыҧсадгьыл ахьчараз иааит Ҭырқәтәылантә, Сириантә, Иорданиантәи ҳашьцәа гәымшәақәа. Урҭ рахьтә аӡәырҩы ршьам-дгьыл рхы ақәырҵеит.

Абарҭқәа зегьы заҳгәалаҳаршәо, аиҳабыра ирыдгыло апартиа "Амцахара" аҧызацәа ируаӡәкыу, Аҧсны Афырхаҵа Г. Саманба Аҧсуа телехәаҧшра иаарту аефираҿ иҟаиҵаз аҳәамҭа аӡбахәалоуп. Адепутат Г. Ҳаџьымба изҵаара аҭакс уи иҳәеит: " ...Убри аҵыхәала сызцәажәо...аменталитет зегь акоуп...абри аҧсуа ишьа злоу именталитет, иага дугаргьы...Уажә исҳәар сҭахым, џьоукы ргәы нсырхар сҭахым...Сириантә иааз роума, Ҭырқәтәылагь ҳцахьеит, ҳаахьеит, ҳашьцәа роуп, аха арҭ, ара иҟоу иаҳа... интегрировать ҟаҳцар... ирласны иаҳа апроблема- адемографиа атәы иаҳа ирыӡбоушәа сгәы иаанагоит..." ( авидеонҵамҭа аҟнытә ацитата).

Абасала, Аҧсны амчратә партиа алидерцәа руаӡәк иаахтны иҳәоит адепортациеи амҳаџьырреи зхыганы зҭоурыхтә ҧсадгьылахь ихынҳәуа ҳашьцәа раасҭа, амилаҭтә демографиатә зҵаара зыӡбар зылшо ақыртуа агрессорцәа ирыдгылаз, атеррористцәа ҧхьазкуаз, иахьа ҳаиҳабыра массала аҧсуа паспортқәа зырҭаз, Қырҭтәыла иатәылауаау Гал ауааҧсыра роуп ҳәа. Ҳгәы иаанагом абри агәаанагара намыс змоу ҧсыуак дадгылап ҳәа. Аҧсны Апарламент адепутатс иҟаз Г. Саманба изымдыруа дыҟам иара зыӡбахә имоу, зхылҵшьҭра аҧсыуоу агырқәа рахьтә шәҩыла ампыҵахаларатә архәҭақәа ирыланы ишеибашьуаз, насгьы рсиа, рабџьарқәа рномерқәа ашәҟәы ишҭаҩу.

Иџьоушьартә иҟоуп, ҳадиаспора ргәы нзырхаз, ҳмилаҭтә интересқәа ирҿагыло ари аҳәамҭа ахьақәҿырымҭыз зполитикатә риторика ҵыхәаҧҵәара амам Аҧсны анапхгара.

Гал ауааҧсыра рзинқәа Аҧсны азакәанҧҵарала ишьақәыргылахароуп. Урҭ Аҧсны атәылауаҩра рҽаҧсартәроуп, ақырҭуа тәылауаҩра мап ацәкрала.

Аҳәаанырцәтәи ҳџьынџьуаа зинла ҳара иҳаҟароуп, урҭ рыда ргылашьа ҳамам ихьыҧшым, зхы иақәиҭу Аҧсуа ҳәынҭқарра. Арепатриациа еиҳау приоритет амазам аҧсуа милаҭ реиҭаҿиара апроцесс.Абри еилаҳкаарц ҳахәҭоуп зегьы.

Аҧсны жәлар ракзаара Афорум.

Аҟәа, 6.09.2013 ш.